◆ 邵天骏

小辰光，屋里从浦西搬到浦东。一转眼，就到了搿片号称“都市里个村庄”个地方，样子搭浦西完全两样。满眼侪是绿，看啥物事侪觉着老新鲜。

新村里头外头，简直是两个世界。近二十幢青砖墙面个三层公房，被围墙圈辣当中。四周侪是农田，还看得见袅袅炊烟，搿些楼房立辣海，格外惹眼。住辣此地个大多是浦西搬过来个，讲个也基本浪是浦西口音。

我搭一帮小朋友整天腻辣一道，打弹子、刮纸片、捉迷藏、钓鲫鱼、寻夜胡子、勾皮虫，白相得勿亦乐乎。

新村外头，一条条弯弯曲曲个小河浜长满水草，我心里总痒兮兮个，就想去兜兜看看。离家勿远还有只小水塘，闹中取静，风景特别好。四周绿树成荫，塘边有条小路，路边野草野花被风一吹，晃晃悠悠，斜气好看。水面漂着一片片浮萍，时常有小鲫鱼、穿条鱼慢悠悠游来游去。

我约了两个小朋友来此地钓鱼，想碰碰运气。讲起来也有趣，阿拉用个鱼竿侪是自家削个竹竿，勿算老长。鱼线浪装了自制个浮标，鱼饵就是塘边泥里挖个蚯蚓。

有一日，阿拉蹲辣塘边钓了好一歇。忽然看见鱼线往下一沉，心想肯定是条大鱼上钩了。连忙往上拎，分量重得要命，鱼竿半天提勿起来。我小心翼翼慢慢收线，等水里个物事露出水面，当场吓一跳——根本勿是鱼，黑黢黢一团，样子怪里怪气。我吓得连鱼竿也覅了，拔脚就逃。几个小朋友看见了，也跟牢我一道逃。到现在，我也想勿出当时钓上来个到底是啥东西。

大热天寻夜胡子，是阿拉小辰光经常做个事体，讲起来还真有眼难度。夜胡子叫起来好听，停辣树浪一动勿动，看起来蛮好捉，其实警惕性斜气高。人稍微靠近一点，伊马上就勿叫了。拿网兜捉伊，既要耐心，又要眼明手快，结果仍旧常常落空。但只要捉回来养成功，心里个开心搭满足，真是讲也讲勿出。所以捉夜胡子，也成了我小辰光固定个游戏项目。

后来屋里养了几只小鸡，蛮讨人欢喜。我就约了小朋友，一道去杨高路附近树多个地方勾皮虫，拨小鸡吃，好让伊长得快点。日里向太阳火辣辣，阿拉几个人满头大汗，却一点也勿在意。勾满一篮皮虫，回去剪开外壳喂小鸡。勿过辣树浪勾皮虫蛮吓人个，五颜六色个刺毛虫会跟牢树枝落下来，一旦被伊叮到，马上就会出血，半点勿留情面。

当年浦东个记忆，淡淡薄薄，零零碎碎，但每一段侪格外珍贵。每每想起搿段无忧无虑个辰光，心里就满满当当，好像又回到了童年岁月。