◆ 金洪远

圣野先生是上海儿童诗界个老前辈。伊老早帮王森老师个儿童诗集《三只小鸟》写过序言，亲切叫王森“甜哥儿”。迭个称呼，要追溯到上世纪50年代——两家头一道辣福建个《榕树丛刊》浪发诗作，从搿个辰光起，结下了跨越六十多年个童心诗缘。

王森老师早年写过一首民歌《戴花要戴大红花》，经过作曲家谱曲，唱遍全国。虽然写童谣只勿过是伊个“副业”，但笔头功夫半点勿含糊。《三只小鸟》《国旗国旗真美丽》接连拿了全国奖，后一首还被选进小学音乐课本。伊常常讲：“童谣姓童名谣，童心加童趣，才是儿歌呀。”而伊自家，就是搿句闲话最好个注解。

王森老师有一颗勿老个童心，讲到搿点，阿拉化工局个诗友们最有体会。埃歇辰光，伊提议辣鲁迅公园个茶室搞聚会，每人即兴写一首童谣互相唱和，大家纷纷响应。老先生还为了迭次聚会写了诗：“曾经天真又无邪，相聚特选儿童节。谈笑风生老变少，喜迎盛世从头越。”隔壁桌子个茶客听了，侪讲：“迭位老先生假使再系一条红领巾，就更加贴切了！”搿难道勿是圣野先生称赞伊是“甜哥儿”最生动个注脚吗？

记得有一趟，王森老师建议我拿化工局诗友聚会个事体，写成一篇叫《乐在“三会”中》个特写，向新民晚报投稿。文中所谓“三会”，就是“群英会、茶话会、赛诗会”。我听了就写了一篇文稿，试着投了稿。呒没想到很快就辣2016年1月31日个“金色池塘”版刊登了出来。稿子见报后，我和诗友文达兄特地跑到伊浦东个屋里报喜。老先生听了也斜气开心，伊对阿拉讲：“我年纪大了，写长文章有点吃力了，但童谣我一直老欢喜个。”伊问阿拉：“晚报‘上海闲话’版浪个童谣，看到了口伐？”阿拉连连点头：“看了看了，侬写得斜气精彩！”伊还特地关照：“现在我年纪大了，外头个活动大多推脱了，但阿拉个诗友聚会，一定要通知我，让我也来开心开心。”

王森老师每天侪要读新民晚报，尤其喜欢“上海闲话”版面。伊辣上面发表过勿少充满童趣个童谣。每次诗友聚会，伊总归是最早到个，安安静静坐辣茶室里等大家。有一趟，阿拉齐声朗诵伊个新作《盲爷爷过路口》：“盲爷爷，过路口，引来两个小朋友。一个左，一个右，亲亲热热手拉手。盲爷爷，乐悠悠，好像雷锋伴着走。”刚刚念好，王老师就拍手笑起来讲：“你们记性哪能介好啦！”

王森老师离开阿拉已经五年了。每次翻开伊送拨我个两本童谣集，耳朵边就会浮现出伊爽朗个笑声，眼门前也仿佛又看到伊纯净慈祥个笑容。王老师，阿拉搿点诗友一直老想念侬个。